|
Am Samstag der elft Juni 2005 hent schich zäh Persone am Morgu um achti bim Bahnhof Roggwil Dorf bisammlut. Iischi Reis isch ins Wallis nach Brigerbad gangu. Nachum umschtigu z Langutal und emu Halt in Herzogubuchsee sind alli Teilnämer im Zug Richtig Bäru gsi. Als wier z Bäru umgschtigu si und im Zug Richtig Brig hei ghocku, hei wier iisch mit emu feinu Zopf, 1,5 Kilo Chäs und üfschnitt verpflegt. Als wier alli satt si gsi, hewer nu d Mannschafte mit Jasscharte üsglosut. In dene Mannschafte hewer de am Samstag Beach-Volleyball gschpillt. Nadem das wer z Brig acho sii und z Poschtauto nisch z Brigerbad üsgladu hett, sii wer zersch ischi Zälti iner Unerkunft ga üfschtellu. Nadem alli iru Schlafplatz inschtalliert hent kä, isch der Wettkampf im Beach-Volley los gangu. Wier si mit drii Tiims mit je vier Schpiler gschtartut (Ballzöiberer 1,2,3). Nach diverse Gruppuschpill hett mu mindeschtens ufum drittu Rang miessu si, fer nu en Schaas uf ene güete Platz chännu z hä. Leider hetts keini va de dri Mannschafte ine Final gschafft. Nach dum Nachtässu is ine zweit Teil ubergangu, wa es gmietlichs Zämusi nit z churz isch cho. Am Sunntag am Morgu is witer gangu mit dum Badnercup (Füüschtballturnier). Nach der Tagwacht is zum Wettkampfplatz gangu, wa beidi Tiims iru erscht Schpill in Agriff hent gnu. Beidi Tiims hent iner glich Gruppa gschpillt, na dum Mittagässu hett de nu z Derbi stattgfundu. Nach alle Gruppuschpill hett mu gwisst, dass MR Roggwil 1 im Final isch. Der Gägner isch aber z schtarch gsi und wier hei z Schpill verloru. Am Schluss hewwer der güet zweit Rang erreicht und di zweit Mannschaft der füüft Schlussrang. Wenigi Minüte nadum letschtu Schpill is fer acht Schpiler wider Richtig Oberaargau gangu. Nach der Rangverkündigung und emu super Raclettnachtässu isch öi dische schön Tag verbi gangu. Am Mäntag na dum Morguässu hewer bischlossu nu en Abschtächer ins Thermalbad z machu. Am schpäteru Namittag hei öi wier ischi Heimreis miessu aträttu. äs isch es sehr schöns und glungus Wuchunend gsi. Es härzlichs Vergältsgott dum Martin fer d Reiseleitig und der Famili Jossen fer d Unerkunft. Roger Lerch
|
TEILEN
