Spieltag in Lotzwil

Am Näbu a wo a däm Sunndimorge überem Turnhallegländ vo Lotzu isch ghanget hät me chönne meine es sigi eher 3. Oktober aus Afangs Mai. Entsprächend nass isch dr Rase gsi, wo 6 Volleybau- und 3 Korbbaufäuder druffe stöh. D’Turnvüreine Roggu si mit 2 Herre Volleyteams (drvo eis vor Männerriege) und eim Mixed-Team agreist.

Di erschte Baukontakte si üssert schwirig gsi, isch doch nachem Rase ou scho gli dr Bau nass worde und so het’s ou einige Showilage gäh um dr Bau im Spiu z’haute. D’Herre hei scho im jewilige erschte Spiu mit Bodeunäbeheite müesse kämpfe, so dass dr Organisator churzerhand das ziemli töife Loch mit Sang het ufgfüut. Im Spiuplan hets für die beide Mannschaft 8 Spüu gäh, jede gäge jede, drfür ke Finaurundi. So het me sech ke Usrütscher dörfe erloube, weme dr Titu vom Vorjohr wot vürteidige. S’Mixed-Team het sech dürne Gruppephase gschlage und nächär no Rangspüu gha. Do me unerwartet am Morge uf 2 Uswächsu-Spiler het müesse vürzichte (eini zum Korbbau und eine zur Männerriege), het me ou keni Optione gha zum wächsle. Mi het zwar zwüschedüre gueti Asätz zeigt, aber im grosse und ganze isch die fählendi technischi Finesse und haut eifach ou d’Durschnittsgröss vo de SpilerInne e z’grossi Hypothek gsi. Immer wieder het me nid schön abgnoh oder gstöut oder isch eifach fausch gstange. S’Blocke isch ou z’churz cho und gäge Teams wo super Smashe – quasi hoffnigslos. Somit het me am Schluss um die letschte 4 Plätz gspiut. Aus chlises Erfougserläbnis het me wenigschtens s’letschte Spiu gwunne, was dr zwöitletschti Schlussrang bedütet het.

D’Herre hei ire Titu vom Vorjohr wöue vürteidige und si mit höche Ziu gstartet. Nächdäm dr Rase ou troche isch worde und sech d’Sunne definitiv düregsetzt het, si d’Spiuzüg e chli „usglichener“ und besser worde. So het me im letschte Spiu gäge d’Männerriege dä Sieg chönne sichere, obwou mes ou dört no spannend het gmacht – die hei enang nämlech nüt gschänkt! So si d’Herre zwüschedüre bis 4 Punkt im Rückstang gsi, hei sech aber immer wieder häre kämpft! Nach 2008 simer somit nomou Vürbandsmeischter – härzlechi Gratulation.

Männerriege, vürstercht mitem Präsi vom STV, het e dürzognige Tag erläbt. Zwar het me gueti Spiu gha und immer wieder es Satzpunkt chönne sicher. Züschedüre si aber ou Gägner ufem Platz gsi, wo miteme usklüglete Spiusystem d’Lückene bir MR gnadelos hei usgnützt. Sie hei sech am Schluss im 7. Rang platziert.

So het me de bime Bierli oder zwöi dä Sieg no begosse und natürlech ou gross diskutiert. Wie meischtens het’s am Schluss fasch nume no Roggwiler (und Mäuchnouer) gha. So isch me de bime Gwitterräge miteme Velo gstafflet ufe Heiwäg. Wiu: „Nachem Näbu schiint d’Sunne, nach dr Sunne do rägnet’s – i dr Schwiz, i dr Schwiz, i dr Schwiz!“.

Stegu

Rangliste Spieltag

Kommentar verfassen

X
%d Bloggern gefällt das: