S’erschte Mou ir Gschicht vor TBOE-Volleybaumeischterschaft het’s das Johr e Schlussrundi gä für aui Teams. Die het z’Roggu stattgfunde. Die letschti Meischterschaftsrundi isch so a däm Wuchändi ustreit worde. Zauriichi Häufer hei am Samschti die 3 Hallene und d’Feschwirtschaft igrichtet. D’Herre hei am Samschti Nomittag gspiut. Bim Herre 2 isches um nüt meh gange und si hätte höchschtens nochli Aarwange chönne ärgere. Das isch nid glunge, so das sie die Meischterschaft im letschte Rang hei abgschlosse. S’Vürletzigspäch het sicher drzue biitreit, dases nid eso gloufe isch.
Bim Herre 1 isch d’Usgangslag spannend gsi. Mi hät sowou chönne abstiege aus ou no 3. wärde. S’Ziu vorem Saisionstart isch e Podeschtplatz gsi. Im erschte Spiu gäge Oberburg (ume Abstieg) heimer üs für einisch ke Blössi gä und souverän i 2 Sätz gwunne. Im zwöite Spiu gäge Dürreroth isches de ume 3. Platz gange. Es isch usgliche gsi und im tiebreak heimer üs de knapp chönne düresetze. Super, doch wieder uf’s Podescht! Gratuliere ar ganze Mannschaft, mir hei am Schluss no einisch chönne zeige, dasmer Potenziau hätte.
Am Sunndimorge hei de Dame gspiut. Do si vo üs 2 Schiris und natürlech s’ganze Chuchiteam im Isatz gstange. Dr Demian het die Herre sowit im Griff gha und das isch aues ribigslos über d’Bühni. Danke viu Mou. Das d’Froue keni grosse Ässer si, das heimer gwüsst und so het sechs Grillteam am Mittag ou viu meh chönne uf e stürmisch Luft chönne konzentriere, wo üs grad s’Zaut het wöue mitnäh.
Am Nomi het de no einsch s’Mixed team id Hose dörfe. Ou do simer hoffnigslos ufem Abstiegsplatz gsi. Wemer bedänkt, dasmer nid weniger aus 5 nöie Spiler hie igsetzt und üses System stark uf s’Stelligsspiu ufbout isch, de vürwungeret das nid witer. Für Morau z’tanke heimer wenigschtens s’auerletschte Spiu vor Saison no chönne gwünne. Danke viu Mou ou hie a aui wo mitgspiut hei.
Usblick: Ig aus Volleybau-Vürantwortleche studiere natürlech ou immer dranne ume, öb aues richtig sigi gsi und wis witergeit. Sicher si einigi personelli Entscheide nid richtig gsi, zudäm het – und das het mi meh gstört – dr Teamgeischt ou gfäut. Mir si nid mit fröid ar Sach gsi und das isch Jammerschad. Schliesslech gömer i üsere Freizyt go Volleyle und de sött me doch Spass ar Sach ha. Zäme mit mim Leiterteam (Sabi und Rouf) wärde mer im Summer wieder zämehocke und d’Situation für die nöchschti Meischterschaft überdänke. Danke ou hie dene zwöine, womer immer tatchräftig mithäufe.
Zum Schluss darfi am Rouf no gratuliere zum Schiri. Är het die Prüefig bestange und wird für üs i Zuekunft hie und da es Spiu dörfe pfiffe.
Stephan Huber
