Am Samschtimorge, 15.9.2012 hei sech 8 Turner mitem Zug ufe Wäg id Innerschwiiz gmacht. Nachdäm Platzproblem vor SBB üs e haubstündigi Stehparty het ufzwunge heimer z’Luzärn – i-phone sei Dank – dr Zug gwächslet. Es heigi im Interregio viu meh Platz. So heimer die zwöiti höufti vor Reis bis uf Flüele sitzend chönne absolviere. Dört simer use und ohne witeri Zwüschestopp losgloufe. Scho gli heimer es paar Meter über dr Vierwaudstättersee-Riviera e erschti Pouse gmacht. Die einte heis Bierli trunke, die angere eifach eso id Büsch oder übere Wäg glärt. Bi däm erschte Haut simer bereits düre zwöiti Kanton gloufe – ufem Wäg vor Schwiiz wächsle die nämlech aui paar Kilometer. Dr Lärm vor Axestross isch uf de erschte paar Kilometer üse stetige Begleiter gsi, trotzdäm het’s no glängt für e Nachhiuf Ungerricht wime e Föuswandlengi cha berächne (Sekunde wo e Stei flügt bis är unge isch mou 9,irgendöppis = d’Meter – schiinbar!).
Ou heimer es paar Sauzfischli usgsetzt oder us dr Ferni am Gloggespiu ir nöchi vor Täuskapäue zueglost. Nacheme churze Haut bir Täusplatte si mer de nach Sisikon ändlech vor Axestross wägcho. Das aber nid ohne e ghörigi Mängi Schweisstropfe für die 400 Höhemeter zum Ussichtspunkt höch überm Vierwaudstättersee. Dört hets de Iblick i die ungerschiedleche Mittagsmenüs gää, wo jede het mitgschleipft. Über Morschach isch de üse Marsch z’Brunne z’Ändi gange. Dört hets no e feini Glace gä und nächär si mer ab uf’s Schiff. 2 Stung heimer ufem See vürbrocht, drbi über Bärggipfle, Schwiizerfahne, Attentäter und Seilbahne diskutiert. Wobi sech dr einti oder angeri vo dere 4,5 Stunde-Wanderig miteme Nickerli erhout het.
Z’Luzärn isch me wider ufe Zug und über Olten hei gfahre. Mir danke am Reiseleiter für d’Organisation. Ig persönlech bi e chli enttüscht über d’Gruppegrösse – hoffe mer emou, dases im 2013 wider e chli meh Turner si, wo sech ar Vüreinsreis beteilige.
Stegu Huber
no images were found
