Dr Froueturnverein geit am 25. Ougschte uf Reise. Viertu vor achti sueche sich 28 Turnerinne im nöie Gerber Car ihres Plätzli. Wie seit me so schön, we Aengu reise lacht dr Himmu, das trifft hüt würklech zue.
Leider het üsi Reiseleitere, Sandra Leuenberger, notfaumässig is Spitau müesse, jetz übernimmt üsi Presidänti s‘Käthi ihre Job, u füehrt üs suverän düre Tag.
Dr erschti Haut fürs Kafi hei mir bereits in Holderbank. Früsch gsterkt geits witer übere ober Houeschtei is schöne Basubiet. Weisch no, ds Buebedorf si mir am eidgenössische Turnfescht gsi, ghört me hingefüre rüefe. Im Umeluege si mir scho ir Stadt Basu. Uese Choffeur, dr Schär Andrè macht für üs no e chlini Stadrundfahrt u weiss auerlei z’verzeue. Jetz chöme mir i Rhihafe mit Hunderte von Container wo uf Tanker verlade wärde. Mit em Schiff fahre mir Rhi ufwärts, beschtune auti ehrwürdigi Hüser u Mure vor Stadt. Bis uf Rhifäude passiere mir zwo Schleuse. Sehr idrücklech, wie üses Schiff höher stigt. Het das schöni Badianstaute mit viune Gescht, ou die gniesse dä wunderbar heiss Tag u stüze sich i Rhi. Im Restorant ufem Schiff sueche mir gäng wieder es schattigs Plätzli.
Dr Choffeur erwartet üs am Schiffsstäg in Rhifäude u jetz geit uf d’Stadtfüehrig. Uese kompetänt Stadtfüehrer weiss viu z’verzeue. Mir si uf däm Ort überem Rhi wo vor mängem Johr e Burg gstange isch, jetz gseht me nume no s’Burgfrölein us Stei. Witer geits i d‘ Autstadt. Ire aute Chile mit verschiedene Stilepoche vernäh mir ou dr Ursprung vom Usdruck „haut d’Chlappe“. Idrücklech isch ou dr Bsuech im Rathus wo mir die verschiedene Wappe u Porträts vo de Adlige chöi bestune. Luschtig isch ou dä Schafbock, oder ischs e Geissbock? wo are Husmur am vieri hin und här louft. Nach dene interessante Usfüehrige gönne mir üs no e chüehle Drink am Rhi.
Jet zisch Zyt für d’Abfahrt Richtig Sissach. Uh, isch das es schmaus, kurvigs Strössli vo zum Rest. Alpbad füehrt. Nach üsem Nachtässe, Steak, Wienerschnitzel oder Fisch und üppigem Salat und eme Glesli Wy geits wieder dr Heimat zue. Wohlbehaute u zfriede chöme mir am achti wieder deheim a.
E tolli Reis mit viu Erläbnis geit z’Aend. Merci für die gueti Organisation.
no images were found
